ນະຄອນຫຼວງວຽງຈັນ, ວັນທີ 23 ມິຖຸນາ 2014— ພິທີເລີ່ມການກໍ່ສ້າງຫ້ອງການໃໝ່ຂອງ ກຸ່ມທະນາຄານໂລກ ໄດ້ຖືກຈັດຂຶ້ນໃນມື້ນີ້ ເຊິ່ງໃຫ້ກຽດເຂົ້າຮ່ວມໂດຍ ພະນະທ່ານນາງ ທິບພະກອນ ຈັນທະວົງສາ, ລັດຖະມົນຕີຊ່ວຍວ່າການ ກະຊວງການເງິນ, ແລະ ທ່ານ ແອັກເຊລ ວັນ ຕຼອດເຊັນເບີກ, ຮອງປະທານທະນາຄານໂລກປະຈຳພາກພື້ນອາຊີຕາເວັນອອກ ແລະ ປາຊີຟິກ. ຫ້ອງການດັ່ງກ່າວແມ່ນຈະສ້າງຕັ້ງຂຶ້ນຢູ່ທີ່ ບ້ານຊຽງຍືນ, ເມືອງຈັນທະບູລີ, ນະຄອນຫຼວງວຽງຈັນ, ແລະ ຈະສາມາດບັນຈຸພະນັກງານທະນາຄານໂລກໄດ້ປະມານ 100 ຄົນ. ອາຄານ 3 ຊັ້ນນີ້ ແມ່ນຈະມີຮູບແບບຄວາມເປັນລາວ ແລະ ຈະສະທ້ອນແນວຄວາມຄິດຂຽວສະອາດ ໂດຍການນຳໃຊ້ລະບົບພະລັງງານຈາກແສງຕາເວັນ, ລະບົບເກັບກັກນໍ້າ, ລະບົບນຳໃຊ້ແສງທຳມະຊາດ, ລະບົບຮ່ອງບຳບັດນ້ຳເສຍ ແລະ ການນຳໃຊ້ວັດສະດຸ ທີ່ເປັນມິດກັບສິ່ງແວດລ້ອມ. ອາຄານດັ່ງກ່າວ ຍັງຈະໄດ້ອະນຸລັກຮັກສາວັດຖຸບູຮານທີ່ຖືກຄົ້ນພົບ ໃຫ້ສາທາລະນະໄດ້ເຂົ້າຊົມ. ການກໍ່ສ້າງນີ້ ຄາດວ່າຈະສຳເລັດໃນຕົ້ນປີ 2016 ແລະ ຈະລວບລວມເອົາບັນດາອົງການຕ່າງໆທີ່ຂຶ້ນກັບກຸ່ມທະນາຄານໂລກ ທີ່ດຳເນີນງານໃນ ສປປ. ລາວ, ລວມທັງອົງການ ການເງິນສາກົນ IFC, ໃຫ້ມາຢູ່ໃນອາຄານດຽວກັນ. ໂຄງການກໍ່ສ້າງອາຄານທີ່ສຳຄັນຫຼັງໃໝ່ ໃນນະຄອນຫຼວງວຽງຈັນນີ້ ແມ່ນສະແດງໃຫ້ເຫັນເຖິງຄວາມມຸ່ງໝັ້ນເອົາໃຈໃສ່ ຂອງທະນາຄານໂລກ ໃນການຮ່ວມມືພັດທະນາຢ່າງແໜ້ນແຟ້ນກັບລັດຖະບານແຫ່ງສປປ. ລາວ ໃນໄລຍະຍາວ ແລະ ຄວາມຍຶດໝັ້ນເອົາໃຈໃສ່ຊ່ວຍເຫຼືອປະຊາຊົນລາວ.
ສປປ. ລາວ ໄດ້ເຂົ້າເປັນສະມາຊິກຂອງທະນາຄານໂລກ ເມື່ອ 50 ປີກ່ອນ ແລະ ເຂົ້າເປັນສະມາຊິກຂອງອົງການ ການເງິນສາກົນ ໃນປີ 1998. ທະນາຄານໂລກ ໄດ້ເປີດຫ້ອງການທຳອິດ ຢູ່ໃກ້ປະຕູໄຊ ໃນປີ 1999. ສາຍພົວພັນລະຫວ່າງ ລັດຖະບານແຫ່ງ ສປປ. ລາວ ແລະ ທະນາຄານໂລກ ແມ່ນນັບມື້ນັບເຂັ້ມແຂງຂຶ້ນ ໃນໄລຍະຫຼາຍທົດສະວັດທີ່ຜ່ານມາ. ພາລະກິດຂອງທະນາຄານໂລກແມ່ນການຫຼຸດຜ່ອນຄວາມທຸກຍາກ ແລະ ສົ່ງເສີມການແບ່ງປັນຄວາມຈະເລີນຮຸ່ງເຮືອງຮ່ວມກັນ. ທະນາຄານໂລກໄດ້ສະໜອງການຊ່ວຍເຫຼືອທາງດ້ານການເງິນໃຫ້ແກ່ ສປປ. ລາວ ເປັນຈຳນວນຫຼາຍກວ່າ 1.4 ຕື້ໂດລາສະຫະລັດ ລວມມີທຶນຊ່ວຍເຫຼືອລ້າ ແລະ ທຶນກູ້ຢືມແບບບໍ່ມີດອກເບ້ຍ. ພ້ອມນັ້ນ ທະນາຄານໂລກຍັງຊ່ວຍເຫຼືອ ວຽກງານການວິເຄາະ ແລະ ໃຫ້ຄຳແນະນຳດ້ານນະໂຍບາຍ ຕໍ່ບັນຫາຫຼັກໆ ໃນການພັດທະນາ ໃນ ສປປ. ລາວ.
