សង្ខេបសំខាន់ៗ
- គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ដែលគាំទ្រដោយធនាគារពិភពលោក កំពុងបង្កើនលទ្ធភាពទទួលបានការផ្គត់ផ្គង់ទឹកស្អាតតាមបណ្តាញបំពង់ និងការកែលម្អសេវាអនាម័យ ហើយពង្រឹងការបំពេញកិច្ចរបស់អ្នកផ្តល់សេវាថែមទៀត។
- ស្ថានីយផ្គត់ផ្គង់ទឹកស្អាតនៅកម្ពុជា ត្រូវបានលើកទឹកចិត្តឱ្យជ្រើសរើសស្ត្រីចូលធ្វើការឱ្យច្រើនជាងមុន។
- ស្ថានីយផ្គត់ផ្គង់ទឹកស្អាតខេត្តមណ្ឌលគិរី បានបង្កើនសមាមាត្របុគ្គលិកជាស្ត្រីពី ១២% ក្នុងឆ្នាំ ២០១៩ ដល់ ៣២% នៅឆ្នាំ ២០២៤។
នៅក្នុងមន្ទីរពិសោធន៍ដែលស្ថិតនៅក្បែរអាងទឹកធំៗមួយជួរ លោកស្រី ស៊ឹម សុគា ក្នុងឯកសណ្ឋានពណ៌ស កំពុងអង្គុយធ្វើការជាមួយម៉ាស៊ីនតេស្តគុណភាព និងសារធាតុគីមីក្នុងទឹក ជាច្រើនគ្រឿង។ ជាបុគ្គលិកផ្នែកផលិតកម្ម នៃស្ថានីយទឹកស្អាតខេត្តមណ្ឌលគិរី សុគា ពោលក្នុងទឹកមុខញញឹម និងដោយមោទនកភាព ដូច្នេះថា៖ “ក្នុងនាមជាមនុស្សម្នាក់ដែលប្រើប្រាស់ទឹកស្អាត ខ្ញុំចង់ធ្វើការនៅទីនេះ ព្រោះតែចង់ឃើញ និងមានបទពិសោធន៍ថាតើ កិច្ចការនៅទីនេះ គេធ្វើបែបម៉េចខ្លះ”។
ដំបូងឡើយ សុគា បម្រើការងារនៅអង្គភាពនេះអស់រយៈពេលពីរឆ្នាំ ក្នុងឋានៈជាបុគ្គលិកធម្មតា ហើយក្រោយមកទៀត បន្ទាប់ពីទទួលបានការបណ្ដុះបណ្ដាលនឹងនឹងការងារផ្ទាល់ គាត់ត្រូវបានអង្គភាពតម្លើងឋានៈទៅកាន់មុខតំណែងបច្ចេកទេស មើលខុសត្រូវលើការផលិតទឹក និងការធ្វើតេស្តគុណភាពទឹក។
ជារៀងរាល់ព្រឹក សុគា ប្រមូលសំណាកទឹកពីក្នុងអាងនៅស្ថានីយ និងពីលំនៅឋានរបស់អតិថិជន យកមកធ្វើតេស្ត ហើយថ្លឹងមើលសារធាតុគីមី ដើម្បីត្រួតពិនិត្យគុណភាព។ ដំបូងឡើយ អ្នកស្រីជឿថាខ្លួនមិនអាចធ្វើបាន ហើយចង់ឈប់ធ្វើការវិញ ដោយគិតថាវាជាការងាររបស់បុរស។ ប៉ុន្តែ បន្តិចម្តងៗ អ្នកស្រីចាប់ផ្តើមពេញចិត្តជាមួយការងារជាប្រចាំនេះ រហូតដល់យល់ថា គំនិតដែលចង់ឈប់ធ្វើការ គឺជាការគិតខុស។
ដោយមានការលើកទឹកចិត្តពីគណៈគ្រប់គ្រង និងការប្តេជ្ញាចិត្តមុតមាំថាត្រូវព្យាយាមឱ្យកាន់តែខ្លាំង ពេលនេះ សុគា ពេញចិត្តនឹងការងារនេះណាស់ ហើយលើកទឹកចិត្តឱ្យមានស្ត្រីធ្វើការជាបុគ្គលិកបច្ចេកទេស ឱ្យបានច្រើនថែមទៀត។
ជាមួយទឹកមុខញញឹម អ្នកស្រីពោលដូច្នេះថា៖ “ខ្ញុំចង់ផ្ញើសារទៅកាន់ស្ត្រីឯទៀតថា នៅពេលណាស្ថានីយរបស់យើងរើសបុគ្គលិកបច្ចេកទេស សូមដាក់ពាក្យ និងត្រូវហ៊ានសាកល្បង។ កុំស្ទាក់ស្ទើរក្នុងការដាក់ពាក្យសម្រាប់ការងារនេះប្រសិនបើអ្នកចង់ធ្វើ។ ខ្ញុំខ្លួនឯងជាមនុស្សម្នាក់ដែលធ្លាប់ខ្លាចការងារនេះ ប៉ុន្តែឥឡូវខ្ញុំអាចធ្វើវាបាន។ ដូច្នេះ អ្នកក៏អាចធ្វើបានដែរ”។
ស្ថានីយផ្គត់ផ្គង់ទឹកស្អាតមណ្ឌលគិរី ស្ថិតក្នុងចំណោមស្ថានីយមួយចំនួន ដែលគាំទ្រដោយគម្រោងលើកកម្ពស់ការផ្គត់ផ្គង់ទឹកស្អាត និងអនាម័យតាមរយៈហិរញ្ញប្បទានពីធនាគារពិភពលោកសម្រាប់កម្ពុជា។ គម្រោងនេះកំពុងបង្កើនលទ្ធភាពទទួលបានការផ្គត់ផ្គង់ទឹកតាមបណ្តាញបំពង់ និង សេវាអនាម័យកាន់តែប្រសើរឡើង ព្រមទាំងជួយពង្រឹងកិច្ចប្រតិបត្តិការរបស់អ្នកផ្តល់សេវាទឹកស្អាត នៅតាមទីប្រជុំជន និងឃុំនានា។ ស្ថានីយទឹកស្អាតទាំងនេះត្រូវបានលើកទឹកចិត្តឱ្យជ្រើសរើសស្ត្រីចូលបម្រើការងារឱ្យបានច្រើន ដូចមានស្ថានីយខេត្តមណ្ឌលគិរី ជាគំរូស្រាប់។ ស្ថានីយនេះបានបង្កើនសមាមាត្របុគ្គលិកស្ត្រីពី ១២% ក្នុងឆ្នាំ២០១៩ ដល់ ៣២% នៅឆ្នាំ២០២៤។
លោក សូរ សុវណ្ណារិទ្ធ អគ្គនាយកស្ថានីយ មានប្រសាសន៍ថា ពេលប្រកាសដំណឹងជ្រើសរើសបុគ្គលិកម្តងៗ អង្គភាព តែងបញ្ជាក់ច្បាស់ថា ស្ត្រីត្រូវបានផ្តល់អាទិភាព។ នៅក្នុងដំណើរការជ្រើសរើស គណៈគ្រប់គ្រងពិនិត្យមើលពិន្ទុរបស់បេក្ខជន។ ប្រសិនបើពិន្ទុរបស់បុរស និងស្ត្រី មានភាពប្រហាក់ប្រហែលគ្នា នោះ គណៈគ្រប់គ្រងនឹងផ្តល់អាទិភាពដល់ស្ត្រី។
លោក សុវណ្ណារិទ្ធ មានប្រសាសន៍ថា បច្ចុប្បន្ននេះ ស្ថានីយផ្គត់ផ្គង់ទឹកស្អាតខេត្តមណ្ឌលគិរី មានបុគ្គលិកជាស្ត្រីចំនួន៦នាក់ រួមមាននាយករងម្នាក់ ប្រធាននាយកដ្ឋានម្នាក់ ប្រធានការិយាល័យម្នាក់ និងបុគ្គលិកបច្ចេកទេសម្នាក់។ ស្ថានីយសង្កេតឃើញថាស្ត្រីមានទំនួលខុសត្រូវខ្ពស់នៅក្នុងការងារ។
អ្នកស្រី ស៊ូ ស្រីណា អគ្គនាយករងនៃស្ថានីយផ្គត់ផ្គង់ទឹកស្អាតខេត្តមណ្ឌលគិរី បានបម្រើការងារនៅទីនោះអស់រយៈពេលជាងប្រាំមួយឆ្នាំមកហើយៗ។ អ្នកស្រីឯកភាពជាមួយការវាយតម្លៃ ទៅលើគុណភាពការងាររបស់បុគ្គលិកស្ត្រី។
យ៉ាងណាក៏ដោយ ការជ្រើសរើសស្ត្រីឱ្យបានច្រើនមកចូលធ្វើការផ្នែកបច្ចេកទេស នៅតែប្រឈមនឹងបញ្ហាជាច្រើនដោយសារតែការរើសអើង និងកត្តាសង្គម។ ស្ត្រីមួយចំនួនជឿថា ការងារប្រភេទនេះពឹងផ្អែកលើកម្លាំងពលកម្ម ទាមទារចំណេះដឹងខ្ពស់ ហើយស័ក្តិសមសម្រាប់តែបុរសប៉ុណ្ណោះ។
ស្រីណា មានប្រសាសន៍ដូច្នេះថា៖ “មានកត្តាសង្គម កត្តាគ្រួសារចោទឡើងជានិច្ច។ រឿងសំខាន់គឺត្រូវស្វែងយល់ពីគ្រួសារ មានន័យថា តើគ្រួសារមួយចង់ឱ្យប្រពន្ធ និងកូនស្រីទទួលបានបទពិសោធន៍អ្វីថ្មីឬអត់។ គ្រួសារគឺជាកត្តាជំរុញទឹកចិត្តធំជាងកត្តាសង្គមខាងក្រៅ”។
នៅពេលអនាគត ស្ថានីយនឹងជ្រើសរើសស្ត្រីបន្ថែមទៀត សម្រាប់ផ្នែកអាជីវកម្មដែលមានទំនាក់ទំនងផ្ទាល់ជាមួយអតិថិជន ហើយនឹងស្វែងរកវិធីសាស្រ្តដើម្បីគាំទ្រដល់បុគ្គលិកជាស្ត្រី។
លោក សូរ សុវណ្ណារិទ្ធ អគ្គនាយកស្ថានីយផ្គត់ផ្គង់ទឹកស្អាតខេត្តមណ្ឌលគិរី មានប្រសាសន៍ថា៖ “នៅពេលដែលយើងព្យាយាមបង្កើនចំនួនបុគ្គលិកជាស្ត្រី ចាំបាច់ណាស់ដែលយើងត្រូវផ្តល់ការគាំទ្រគ្រប់គ្រាន់សម្រាប់តម្រូវការរបស់ពួកគាត់។ នេះរួមបញ្ចូលទាំងការបង្កើតបន្ទប់សមរម្យសម្រាប់ការបំបៅកូនដោយទឹកដោះម្តាយ និងការថែទាំកូនតូច ដើម្បីធានាឱ្យមានការធ្វើអន្តរកម្មដោយរលូនពេលដែលត្រឡប់ចូលធ្វើការវិញ បន្ទាប់ពីសំរាកមាតុភាព របស់បុគ្គលិកស្រី”។
