កម្ពុជានៅក្នុងកាលៈទេសៈមានវិបត្តិកូវីដ-១៩
សារគន្លឹះសំខាន់ៗ៖
- វិបត្តិសេដ្ឋកិច្ចនិងរោគរាតត្បាតទូទាំងសកលលោកដោយសារមកពីជំងឺកូវីដ-១៩ បានបង្កការគំរាមកំហែងខ្លាំងមែនទែនមកលើការអភិវឌ្ឍដែលកម្ពុជាសម្រេចបានក្នុងរយៈពេល៣០ឆ្នាំចុងក្រោយនេះ នៃប្រវត្តិសាស្ត្ររបស់ខ្លួន។
- វិស័យបីដែលរងការប៉ះទង្គិចខ្លាំងជាងគេ — គឺវិស័យទេសចរណ៍, ឧស្សាហកម្មផលិតសម្រាប់នាំចេញ, និងវិស័យសំណង់ — មានចំណែកជាង ៧០ភាគរយនៃកំណើនសេដ្ឋកិច្ច និងផ្តល់ការងារមានកម្រៃចំនួន ៣៩,៤ភាគរយ នៃការងារសរុប នៅក្នុងឆ្នាំ២០១៩។
- ក្នុងឆ្នាំ២០២០ សេដ្ឋកិច្ចរបស់កម្ពុជាទំនងជានឹងថមថយកំណើនខ្លាំងមែនទែនដែលមិនធ្លាប់មានតាំងពីឆ្នាំ១៩៩៤មក ដោយវានឹងថមថយខ្លាំងធ្លាក់រហូតដល់កម្រិតរវាង -១ភាគរយ ក្នុងសេណារីយោគោល និង -២,៩ ភាគរយ ក្នុងសេណារីយោដែលទាបបំផុត។ ភាពក្រីក្រអាចនឹងកើនឡើងពី ៣ ទៅ ១១ភាគរយ ពិសេសក្នុងចំណោមក្រុមគ្រួសារដែលប្រឡូកពាក់ព័ន្ធក្នុងវិស័យទេសចរណ៍, ការទិញលក់ដុំនិងរាយ, វិស័យកាត់ដេរ, ផ្នែកសំណង់, ពាណិជ្ជកម្ម, ឬ ក្នុងឧស្សាហកម្មផលិត ក្នុងករណីបើពួកគាត់បាត់បង់ចំណូលអស់ ៥០ភាគរយ ក្នុងរយៈពេលប្រាំមួយខែជាប់គ្នា។
- ជាមួយគ្នានេះ ឱនភាពសារពើពន្ធនឹងឡើងដល់កម្រិតខ្ពស់បំផុតដែលមិនធ្លាប់មានក្នុងកំឡុងពេល ២២ឆ្នាំ កន្លងមក ហើយបំណុលសាធារណៈត្រូវបានរំពឹងទុកថានឹងកើនដល់ ៣៥ភាគរយនៃផលិតផលក្នុងស្រុកសរុប (ផសស) រហូតដល់ឆ្នាំ២០២២។
- អាជ្ញាធររបស់រដ្ឋាភិបាលបានដាក់ចេញវិធានការបន្ទាន់មួយចំនួន ដើម្បីទប់ស្កាត់ការរាលដាលរបស់ជំងឺ និងផ្តល់ជំនួយហិរញ្ញវត្ថុដល់ក្រុមគ្រួសារ, កម្មករ, និងសហគ្រាសដែលរងការប៉ះទង្កិចពីវិបត្តិនេះ។
- ដើម្បីជួយសម្រួលឱ្យសេដ្ឋកិច្ចអាចងើបមានភាពស្វាហាប់ឡើងវិញ រាជរដ្ឋាភិបាលចាំបាច់ត្រូវបន្តធានាឱ្យមានស្ថិរភាពផ្នែកម៉ាក្រូសេដ្ឋកិច្ច និងផ្នែកហិរញ្ញវត្ថុ ហើយបង្កើនល្បឿនការកែទម្រង់ពាណិជ្ជកម្មនិងការវិនិយោគ ព្រមទាំងជំរុញឱ្យកាន់តែលឿនទៅមុខនូវការប្រើប្រាស់បច្ចេកវិទ្យាឌីជីថលក្នុងការអភិវឌ្ឍ។
