“ගම වටේ ඇවිදින්නයි ව්‍යායාම කරන්නයි පටන් ගත්තොත් ඔවුන්ට මිනිස්සු හිනා වෙයි කියලා මට බොහෝ දෙනෙක් කියා තිබෙනවා,” ත්‍රිකුණාමල දිස්ත්‍රික්කයේ තම්පලකාමම් ප්‍රාදේශීය රෝහලේ ස්ථාන භාර වෛද්‍ය නිලධාරී වෛද්‍ය ටී. ජීවරාජ් මහතා පවසයි. ප්‍රදේශයේ ජනතාව සෞඛ්‍ය සම්පන්න දිවිපෙවෙතකට හුරු වීමට දිරිමත් කිරීම සඳහා, වෛද්‍ය ජීවරාජ් සහ ඔහුගේ කාර්ය මණ්ඩලය “වැළඳීමට පෙර සුරැකෙමු” යන තේමාව යටතේ ප්‍රජා පා ගමනක් මෙහෙයවීය. මෙම ප්‍රජා පා ගමන සමඟ ප්‍රදේශයේ පිරිමින්, කාන්තාවන් සහ ළමුන් 200 කට ආසන්න පිරිසක් එක්විය.
රෝහල විසින් ගත් ප්‍රයත්නයන් නිසා ආහාර සහ ශාරීරික යෝග්‍යතාවය පිළිබඳ ප්‍රජා ආකල්ප වෙනස් වීමට තුඩු දී තිබේ. “පසුගිය කාලයේ ගමේ අය උදේට ව්‍යායාම කරන බව මම දැක්කා,” වෛද්‍ය ජීවරාජ් සිනාසෙමින් කියයි.
ප්‍රදේශයේ බෝ නොවන රෝග කළමනාකරණ වැඩසටහනේ වගකීම දරන්නේ වෛද්‍ය ජීවරාජ් විසිනි. 2020 මැයි මාසයේ සිට, එම ප්‍රදේශයේ අවුරුදු 35ට වැඩි අයගෙන් 43%කට පමණ පිරිසක් බෝ නොවන රෝග වැළඳී තිබේදැයි සොයා ගැනීම සඳහා පරීක්ෂාවට ලක් කෙරුනි. පරීක්ෂාවට කළ අයගෙන් 30%ක් පමණ ස්ථුලතාවයෙන් පෙළුණු අතර ආසන්න වශයෙන් 15%ක් තරබාරු බවින් යුතු විය. මෙම ප්‍රතිශත තුළ කාන්තා නියෝජනය සැලකිය යුතු තරම් ඉහළ අගයක් ගෙන තිබිණි. “ගෙදර වැඩ ඇරුණාම මෙහේ කාන්තාවන්ට තියෙන්නේ එකාකාරී ඇඟ මහන්සි නොවන ජීවන රටාවක්. බෝ නොවන රෝග ඇති කරවන්න ඒක ගොඩක් බලපානවා” වෛද්‍ය ජීවරාජ් කියයි.
බෝ නොවන රෝගවල අඛණ්ඩ වැඩිවීම ශ්‍රී ලංකාවේ සෞඛ්‍ය සේවා පද්ධතියට බරපතල අභියෝගයක් වී ඇත. බෝ නොවන රෝග කළමනාකරණය සහ පාලනය සඳහා රෝග වැලඳීම අඩු කිරීම අරමුණු කරගත්, ජීවන චක්‍රය පාදක කරගත් ප්‍රවේශයක් අවශ්‍ය අතර, ඒ සඳහා වත්මන් ප්‍රාථමික සෞඛ්‍ය සේවා පද්ධතිය ප්‍රතිව්‍යුහගත කිරීමක් ද අවශ්‍ය වනු ඇත. ලෝක බැංකුව අරමුදල් සපයන ප්‍රාථමික සෞඛ්‍ය සේවා පද්ධතිය සවිබල ගැන්වීමේ ව්‍යාපෘතිය (PSSP) සෞඛ්‍ය අමාත්‍යාංශය විසින් සැලසුම් කරන ලද සුව සත්කාර සේවා ප්‍රතිසංවිධානය කිරීමේ මූලික කාර්යයක් ඉටු කරයි. ප්‍රාථමික සෞඛ්‍ය සේවා පද්ධතිය සවිබල ගැන්වීමේ ව්‍යාපෘතියෙහි පරමාර්ථය වන්නේ වැඩි සෞඛ්‍ය අවදානම් සහිත ජනතාව තුළ බෝ නොවන රෝග හඳුනා ගැනීම සහ කළමනාකරණය කිරීම වෙනුවෙන් ප්‍රාථමික සෞඛ්‍ය සේවාවල ක්‍රියාකාරීත්වය සහ ගුණාත්මකභාවය ඉහළ නැංවීම සඳහා රජයට සහාය වීමයි.
