ລາຄາອາຫານໃນລາວທີ່ເພີ່ມສູງຂື້້ນ ໄດ້ສົ່ງຜົນກະທົບຕໍ່ການຂາດສານອາຫານຂອງເດັກນ້ອຍໃນລາວ, ອີງຕາມບົດແນະນໍາດ້ານນະໂຍບາຍທີ່ຄົ້ນຄວ້າໂດຍທະນາຄານໂລກ ທີ່ໄດ້ນໍາມາເຜີຍແຜ່ໃນມື້ນີ້ມີສອງສະບັບ ຄື ບົດຄົ້ນຄວ້າ ອັດຕາເງິນເຟີ້ດ້ານສະບຽງອາຫານໃນ ສປປ ລາວ: ທ່າອ່ຽງ, ປັດໄຈແຮງຂັບເຄື່ອນ, ແລະ ຜົນກະທົບຂອງເງິນເຟີ້, ແລະ ບົດຄົ້ນຄວ້າ ປັດໄຈທີ່ນໍາໄປສູ່ການຂາດສານອາຫານຂອງເດັກນ້ອຍໃນ ສປປ ລາວ, ມີເນື້ອໃນສະເໜີດ້ານນະໂຍບາຍເພື່ອແກ້ໄຂຜົນກະທົບຈາກໄພເງິນເຟີ້ດ້ານສະບຽງອາຫານ, ບວກກັບມາດຕະການທີ່ແນໃສ່ຊ່ວຍເຫຼືອປະຊາຊົນຜູ້ໄດ້ຮັບຜົນກະທົບຈາກລາຄາອາຫານທີ່ສູງ ໂດຍສະເພາະແມ່ນຄອບຄົວທີ່ທຸກຍາກ ແລະ ລູກໆຂອງພວກເຂົາເຈົ້າ.
ທະນາຄານໂລກໄດ້ປຶກສາຫາລືບົດແນະນໍາດ້ານນະໂຍບາຍດັ່ງກ່າວກັບບັນດາຊ່ຽວຊານວິຊາການຈາກກະຊວງກະສິກຳ ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ ແລະ ອົງການ UNICEF. ວຽກງານດັ່ງກ່າວສະແດງໃຫ້ເຫັນວ່າ ອັດຕາເງິນເຟີ້ດ້ານສະບຽງອາຫານໃນລາວ ໄດ້ເພີ່ມຂຶ້ນເປັນສອງຕົວເລກຕັ້ງແຕ່ກາງປີ 2022, ເຊິ່ງສູງກວ່າທ່າອ່ຽງຂອງໂລກ ແລະ ພາກພື້ນ, ໂດຍສະເພາະແມ່ນລາຄາເຂົ້າທີ່ມີການເໜັງຕີງຫລາຍ. ລາຄາເຂົ້າໄດ້ເພີ່ມຂຶ້ນໄວໃນເຂດພາກເຫນືອ, ບ່ອນທີ່ອາຫານຫຼັກບໍ່ພຽງພໍກັບຄວາມຕ້ອງການ ແລະ ມີການເອື່ຶອຍອີງການນໍາເຂົ້າອາຫານທີ່ເພີ່ມຂຶ້ນ.
ທ່ານ ອາເລັກ ເຄຣມເມີ Alex Kremer, ຫົວໜ້າຫ້ອງການທະນາຄານໂລກປະຈຳ ສປປ ລາວ ກ່າວວ່າ: “ຫຼາຍຄອບຄົວທີ່ທຸກຍາກ ແລະ ມີຄວາມສ່ຽງແມ່ນໄດ້ຮັບຄວາມເດືອດຮ້ອນຍ້ອນລາຄາອາຫານທີ່ເພີ່ມຂຶ້ນ”. "ການປະຕິຮູບດ້ານເສດຖະກິດ, ເຊັ່ນ: ການເພີ່ມການເກັບລາຍຮັບຈາກພາສີອາກອນ ແລະ ການຄຸ້ມຄອງການໃຊ້ຈ່າຍສາທາລະນະໃຫ້ມີປະສິດຕິພາບດີຂື້ນ, ແມ່ນມີຄວາມຈໍາເປັນເພື່ອສ້າງສະຖຽນລະພາບຂອງອັດຕາແລກປ່ຽນ ເພື່ອຊ່ວຍຄວບຄຸມອັດຕາເງິນເຟີ້."
ການຂາດສານອາຫານຂອງເດັກນ້ອຍໃນລາວຍັງຢູ່ໃນລະດັບສູງ, ໂດຍປະມານ ໜຶ່ງສ່ວນສາມຂອງເດັກນ້ອຍລາວຖືກຈັດປະເພດເປັນເດັກທີ່ມີລວງສູງຕ່ຳກວ່າມາດຕະຖານທຽບໃສ່ອາຍຸຂອງພວກເຂົາ, ແລະ ການແກ້ໄຂໃນການຫຼຸດຜ່ອນອັດຕາດັ່ງກ່າວນີ້ຍັງບໍ່ມີຄວາມຄືບຫນ້ານັບຕັ້ງແຕ່ປີ 2017. ບັນຫາການຂາດສານອາຫານນີ້ບໍ່ພຽງແຕ່ຈໍາກັດທ່າແຮງຂອງຊັບສິນດ້ານມະນຸດເທົ່ານັ້ນ, ແຕ່ຍັງສົ່ງຜົນທາງລົບຕໍ່ການເຕີບໂຕທາງດ້ານເສດຖະກິດຂອງປະເທດອີກດ້ວຍ. ການບໍລິໂພກຊີ້ນ, ຜະລິດຕະພັນນົມ, ແລະ ໄຂ່ ຊ່ວຍຫຼຸດຜ່ອນໂອກາດຂອງເດັກທີ່ມີລວງສູງບໍ່ໄດ້ມາດຕະຖານທຽບໃສ່ອາຍຸຂອງພວກເຂົາ, ແຕ່ຫຼາຍຄອບຄົວທີ່ທຸກຍາກບໍ່ຄ່ອຍໄດ້ບໍລິໂພກອາຫານເຫຼົ່ານີ້. ໃນຂະນະດຽວກັນ ກໍມີ 4 ປັດໄຈສຳຄັນທີ່ສາມາດຊ່ວຍຫຼຸດຜ່ອນບັນຫາເດັກທີ່ມີລວງສູງບໍ່ໄດ້ມາດຕະຖານ ໄດ້ແກ່ ການໄປຝາກທ້ອງຂອງແມ່ຖືພານໍາແພດໝໍຢ່າງໜ້ອຍ 4 ຄັ້ງ, ການເກີດລູກນຳແພດໝໍທີ່ຊຳນານ, ການປ້ອງກັນການຖືພາໃນໄວໜຸ່ມ, ແລະ ການປັບປຸງສຸຂາພິບານຂອງບ້ານ.
ທ່ານ ປອ. ສະຖາບັນດິດ ອິນສີຊຽງໃໝ່, ຮອງລັດຖະມົນຕີກະຊວງແຜນການ ແລະ ການລົງທຶນ ກ່າວວ່າ: ວຽກງານສຶກສານີ້ໄດ້ສະໜອງຂໍ້ມູນອັນລະອຽດໃຫ້ທຸກພາກສ່ວນທີ່ກ່ຽວຂ້ອງສາມາດນໍາເອົາໄປພິຈາລະນານໍາໃຊ້ໃນການແກ້ໄຂຫຼຸດຜ່ອນຜົນກະທົບຈາກລາຄາອາຫານທີ່ສູງຂຶ້ນ ແລະ ຫຼຸດຜ່ອນການຂາດສານອາຫານຂອງເດັກໃນລາວ. ການປັບປຸງປະສິດທິພາບຂອງຕະຫຼາດສະບຽງອາຫານຂອງພວກເຮົາຈະຊ່ວຍຮັກສາລາຄາອາຫານໃຫ້ຄົງທີ່ໄດ້ດີຂື້ນ”.
ເງິນກີບອ່ອນຄ່າ ນັ້ນຫມາຍຄວາມວ່າ ສິນຄ້າອາຫານນໍາເຂົ້າ ແລະ ປັດໃຈການຜະລິດກະສິກໍາ ມີລາຄາສູງຂື້ນ ແມ່ນເຫດຜົນຕົ້ນຕໍທີ່ເຮັດໃຫ້ເກີດມີອັດຕາເງິນເຟີ້ດ້ານອາຫານໃນລາວ. ແຕ່ປີ 2017 ຫາ 2023, ການອ່ອນຄ່າຂອງເງິນກີບຕໍ່ເງິນໂດລາ 1% ສົ່ງຜົນ ເຮັດໃຫ້ອັດຕາເງິນເຟີ້ດ້ານສະບຽງອາຫານເພີິິີ່ມຂຶ້ນ 1.1%. ອາຫານທີ່ຊື້ມາກວມເອົາ 1/3 ຂອງການບໍລິໂພກຂອງຄົວເຮືອນ, ເຖິງວ່າປະເທດລາວຈະຜະລິດເຂົ້າໄດ້ພຽງພໍກໍ່ຕາມ, ແຕ່ຫຼາຍຄົວເຮືອນຕ້ອງຊື້ອາຫານເປັນສ່ວນຫລາຍ, ເຮັດໃຫ້ພວກເຂົາໄດ້ຮັບຜົນກະທົບທາງລົບຈາກການປ່ຽນແປງຂອງລາຄາອາຫານ.
ບົດລາຍງານໄດ້ລະບຸວ່າ ການເພີ່ມການເກັບລາຍຮັບຂອງລັດຈະຊ່ວຍໃຫ້ລັດຖະບານສາມາດຊ່ວຍເຫຼືອຄົນທີ່ທຸກຍາກທີ່ໄດ້ຮັບຜົນກະທົບໄດ້ໂດຍຜ່ານມາດຕະການສະຫນັບສະຫນູນ ແກ່ຄົວເຮືອນທີ່ມີລາຍໄດ້ຕໍ່າ ແລະ ຜູ້ທີ່ໄດ້ຮັບຜົນກະທົບ, ຄືກັນກັບໂຄງການຊ່ວຍເຫຼືອທີ່ມີຢູ່ແລ້ວ. ການປະຕິຮູບທຸລະກິດເນັ້ນສ້າງສະພາບແວດລ້ອມຕະຫລາດທີ່ເອື້ອອໍານວຍສາມາດສົ່ງເສີມການຄ້າຂາຍລະຫວ່າງບັນດາແຂວງຕ່າງໆ ເຮັດໃຫ້ການຄ້າສະບຽງອາຫານພາຍໃນສະດວກຂຶ້ນ, ພໍ່ຄ້າສາມາດລໍາລຽງສະບຽງອາຫານໄປບ່ອນທີ່ມີຄວາມຈໍາເປັນທີ່ສຸດເພື່ອຄວາມສົມດຸນຂອງຕະຫຼາດ ແລະ ຮັກສາລາຄາບໍ່ໃຫ້ເຫນັງຕີງແຮງ. ການປັບປຸງຂໍ້ມູນຂ່າວສານຕະຫຼາດກະສິກຳລະຫວ່າງຊາວກະສິກອນ ແລະ ພໍ່ຄ້າ, ການຍົກລະດັບ ແລະ ບຳລຸງຮັກສາເສັ້ນທາງກໍ່ຈະຊ່ວຍໄດ້.
ຊາວກະສິກອນ ແລະ ຜູ້ຜະລິດສະບຽງອາຫານສາມາດຫາໂອກາດໃນການສ້າງກຳໄລໃນຊ່ວງເວລາທີ່ລາຄາສູງ ແລະ ລົງທຶນເຂົ້າໃນວິທີການຜະລິດ ຫຼື ທຸລະກິດຂອງເຂົາເຈົ້າ ເພື່ອໃຫ້ໄດ້ຮັບປະສິດທິພາບຫຼາຍຂຶ້ນ. ເພື່ອອຳນວຍຄວາມສະດວກໃຫ້ແກ່ການລົງທຶນດັ່ງກ່າວ, ຕ້ອງມີນະໂຍບາຍຊ່ວຍໜູນການເຂົ້າເຖິງສິນເຊື່ອ, ຕະຫຼາດ, ແລະ ປັດໃຈດ້ານການຜະລິດກະສິກຳ, ສະໜອງການຝຶກອົບຮົມ ແລະ ການຊ່ວຍເຫຼືອດ້ານວິຊາການ, ແລະ ລົງທຶນໃສ່ຊົນລະປະທານ, ສາງເກັບມ້ຽນຜົນຜະລິດ ແລະ ຖະໜົນຫົນທາງ.
ທະນາຄານໂລກສະໜັບສະໜູນໃຫ້ລັດຖະບານລາວນຳໃຊ້ແນວທາງການຮ່ວມມືຈາກຫຼາຍຂະແໜງການເພື່ອແກ້ໄຂສິ່ງທ້າທາຍດ້ານໂພຊະນາການ ແລະ ຄວາມໝັ້ນຄົງດ້ານສະບຽງອາຫານ. ແນວທາງການຮ່ວມມືຈາກຫຼາຍຂະແໜງການນີ້ປະກອບດ້ວຍການເສີມຂະຫຍາຍວຽກງານການຊ່ວຍເຫຼືອສັງຄົມ, ສ້າງທາງເລືອກໃນການດໍາລົງຊີວິດ, ການດູແລເດັກ, ແລະການເຂົ້າເຖິງການບໍລິການດ້ານສຸຂະພາບ, ໃນຂະນະດຽວກັນກໍ່ປັບປຸງນໍ້າສະອາດ, ສຸຂາພິບານ, ແລະ ສຸຂະອະນາໄມໄປພ້ອມກັນດ້ວຍ.
