ນະຄອນຫລວງວໍຊິງຕັນ ດີຊີ ວັນທີ 26 ເມສາ 2018 – ປະຊາຊົນຫລາຍກວ່າ 140,000 ຄົນ ຈະໄດ້ຮັບຜົນປະໂຫຍດຈາກການກະຕຸກຊຸກຍູ້ ແລະສົ່ງເສີມເພື່ອເຮັດໃຫ້ການຜະລິດເຂົ້າ, ສາລີ ແລະ ຜະລິດຕະພັນກະສິກຳຕ່າງໆ ໃຫ້ມີປະສິດທິພາບ ແລະ ມີກຳໄລຫລາຍຂຶ້ນ ໂດຍຜ່ານ ໂຄງການ ຜະລິດກະສິກຳເປັນສິນຄ້າ ຢູ່ ສປປ ລາວ, ໂຄງການນີ້ໄດ້ຮັບການອະນຸມັດຈາກສະພາບໍລິຫານຂອງທະນາຄານໂລກໃນມື້ນີ້
ໂຄງການມູນຄ່າ 25 ລ້ານໂດລາສະຫະລັດ ຈະສະໜັບສະໜູນ 28,000 ຄົວເຮືອນຊາວກະສິກອນຈາກ 224 ບ້ານເປົ້າໝາຍທີ່ຖືກຄັດເລືອກໃນຂົງເຂດຊົນນະບົດເພື່ອເພີ່ມຜົນຜະລິດ, ປັບປຸງຄຸນນະພາບສີນຄ້າ ແລະ ເພີ່ມຜະລິດຕະພາບດ້ານແຮງງານ ແລະ ເພີ່ມຍອດຂາຍຜົນລະປູກ. ການເຮັດໃຫ້ຊາວກະສີິກອນສາມາດເຂົ້າເຖິງແນວພັນພືດທີ່ມີຄຸນນະພາບສູງ, ການນຳໃຊ້ກົນຈັກ ແລະ ຊົນລະປະທານ ມີເປົ້າໝາຍເພື່ອຫລຸດຕົ້ນທືນການຜະລິດ ແລະ ເຮັດໃຫ້ຊາວກະສິກອນໄດ້ຮັບຕອບແທນສູງຂຶ້ນ.
“ກະສິກຳມີຄວາມສຳຄັນຕໍ່ປະເທດຂອງພວກເຮົາ ໃນການສ້າງວຽກເຮັດງານທຳໃຫ້ແກ່ກຳລັງແຮງງານຂອງພວກເຮົາເປັນຈຳນວນຫລາຍ”, ນີ້ແມ່ນຄຳເວົ້າຂອງທ່ານ ປອ ພວງປາຣິສັກ ປຣະວົງວຽງຄຳ, ຮອງລັດຖະມົນຕີກະຊວງກະສິກຳ ແລະ ປ່າໄມ້ ຂອງ ສປປ ລາວ. “ອິງຕາມທິດທາງຂອງແຜນພັດທະນາເສດຖະກິດ-ສັງຄົມຫ້າປີຄັ້ງທີ່ 8, ສປປ ລາວ ໄດ້ກຳນົດບຸລິມະສິດການເຕີບໂຕທາງເສດຖະກິດແບບສີຂຽວໃນຍຸດທະສາດການພັດທະນາກະສິກຳ ແລະ ປ່າໄມ້ໄລຍະຍາວຂອງຕົນ ແລະ ສຸມໃສ່ປັບປຸງຄຸນນະພາບຂອງການຜະລິດກະສິກຳ, ອາຫານ ແລະ ຜະລິດຕະພັນທີ່ປອດໄພ ໂດຍຖືເອົາວິສາຫະກິດຂະໜາດນ້ອຍ ແລະ ຂະໜາດກາງເປັນໃຈກາງໃນການຂັບເຄື່ອນເຮັດໃຫ້ແຜນຍຸດທະສາດປະກົດຜົນເປັນຈິງ. ໂຄງການນີ້ແມ່ນບາດກ້າວສຳຄັນອັນໜຶ່ງໃນການຈັດຕັ້ງປະຕິບັດແຜນຍຸດທະສາດດັ່ງກ່າວ.”
ຂະແໜງກະສິກຳຂອງ ສປປ ລາວ ກຳລັງປະເຊີນໜ້າກັບສີ່ງທ້າທາຍຫລາຍຢ່າງໃນການຕອບສະໜອງສິນຄ້າກະສິກຳ ຕໍ່ຄວາມຕ້ອງການຂອງຕະຫລາດພາຍໃນ ແລະ ຕ່າງປະເທດ ຍ້ອນຍັງມີບັນຫາຕ່າງໆທີ່ຕິດພັນກັບຜະລິດຕະພາບຂອງການຜະລິດກະສິກຳ, ຄຸນນະພາບຂອງຜົນຜະລິດ ແລະ ການສ້າງກຳໄລ. ໂຄງການນີ້ມີເປົ້າໝາຍທີ່ຈະແກ້ໄຂສີ່ງທ້າທາຍເຫລົ່ານີ້ດ້ວຍການສົ່ງເສີມການຜະລິດກະສິກຳທີ່ດີ, ການປັບປຸງຄຸນນະພາບຂອງຜະລິດຕະພັນ ແລະ ການຫລຸດຜ່ອນຕົ້ນທຶນ; ລວມທັງ ການເຊື່ອມໂຍງຊາວກະສິກອນເຂົ້າກັບທຸລະກິດກະສິກຳ ເພື່ອປັບປຸງດ້ານການຕະຫລາດ; ແລະ ຫັນໄປສູ່ການນຳໃຊ້ເຄື່ອງຈັກເຕັກນິກ ແລະ ເຕັກໂນໂລຊີໃນການປຸ່ງແຕ່ງທີ່ທັນສະໄໝກວ່າເກົ່າ ແລະ ເປັນມິດກັບສີ່ງແວດລ້ອມ ເພື່ອເພີ່ມມູນຄ່າ ແລະ ຫລຸດຜ່ອນການສູນເສຍຂອງຜົນຜະລິດ. ການປັບປຸງສະພາບແວດລ້ອມເອື້ອອຳນວຍທາງດ້ານນລະບຽບການ ແລະ ນະໂຍບາຍ ຈະຊ່ວຍຫລຸດຜ່ອນຄ່າໃຊ້ຈ່າຍໃນການດຳເນີນທຸລະກິດໃນຂະແໜງກະສິກຳ.
“ສປປ ລາວ ກຳລັງປັບປຸງຂະແໜງກະສິກຳໃຫ້ມີປະສິດທິຜົນກວ່າເກົ່າ, ໃຫ້ມີກຳໄລ ແລະ ໃນຮູບແບບສີຂຽວ,” ນີ້ແມ່ນຄຳເວົ້າຂອງທ່ານ ນາງ ເອແລນ ໂກນສະຕິນ (Ellen Goldstein) ຜູ້ອຳນວຍການທະນາຄານໂລກປະຈຳປະເທດ ມຽນມ້າ, ກຳປູເຈຍ ແລະ ສປປ ລາວ. “ບັນດາຄອບຄົວຊາວກະສິກອນ ທຸລະກິດກະສິກຳ ຊາວຄ້າຂາຍຍ່ອຍ ແລະ ຜູ້ບໍລິໂພກ ຈະໄດ້ຮັບຜົນປະໂຫຍດຈາກໂຄງການນິ້້ຊື່ງຈະຊ່ວຍປັບປຸງຄຸນນະພາບ, ເຮັດໃຫ້ມີຜະລິດຕະພັນກະສິກຳລາກຫລາຍຂື້ນ ແລະ ມີລາຄາຖືກລົງ. ຄຽງຄູ່ກັນນີ້ ໂຄງການດັ່ງກ່າວ ຍັງປະກອບສ່ວນໃສ່ ວິທີການຂອງທະນາຄານໂລກທີ່ກຳນົດເອົາ ຫລາຍຂະແໜງການເຂົ້າໃນການແກ້ໄຂບັນຫາການຂາດໂພຊະນາການດ້ວຍການເພີ່ມຄວາມຫລາກຫລາຍຂອງອາຫານເພື່ອບໍລິໂພກອາຫານທີ່ມີໂພຊະນາການຫລາຍຂື້ນ.”
ການຜະລິດກະສິກຳທີ່ມີຄວາມຫລາກຫລາຍຂອງໂຄງການນີ້ຈະແກ້ໄຂບັນຫາການຈະເລີນໄວຂອງເດັກນ້ອຍທີ່ຫລູດມາດຕາຖານ ບັນຫານີ້ມີຜົນກະທົບຫລາຍກວ່າ 40 ເປີເຊັນຂອງຈຳນວນເດັກນ້ອຍທີ່ມີອາຍຸຕໍ່າກວ່າຫ້າປີໃນ ສປປ ລາວ. ໂຄງການນີ້ຈະຊຸກຍູ້ໃຫ້ຊາວກະສິກອນມີຄວາມຕື່ນໂຕໃນການບໍລິໂພກອາຫານທີ່ຄວາມຫລາກຫລາຍ, ການປຸງແຕ່ງອາຫານ ແລະ ຫລຸດຜ່ອນເວລາຂອງແມ່ຍິງໃນການເຮັດວຽກກະສິກຳໂດຍການນຳໃຊ້ກົນຈັກທີ່ທັນສະໄໝ. ຊາວກະສິກອນຍັງຈະໄດ້ນຳໃຊ້ເຕັກໂນໂລຊີເພືຶ່ອປັບຕົວກັບການປຽ່ນແປງດິນຟ້າອາກາດ ແລະເພື່ອເຮັດໃຫ້ຜະລິດຕະພັນກະສິກຳມີຄວາມສະອາດກວ່າ ແລະ ມີມູນຄ່າສູງຂື້ນ.
ໂຄງການນີ້ຈະຈັດຕັ້ງປະຕິບັດຢູ່ແຂວງຄຳມ່ວນ, ບໍລິຄຳໄຊ, ໄຊຍະບູລີ, ແຂວງວຽງຈັນ ແລະ ນະຄອນຫລວງວຽງຈັນ ຈົນຮອດປີ 2024.
ທະນາຄານໂລກໃຫ້ການສະໜັບສະໜູນ ສປປ ລາວ ໂດຍຜ່ານແຜນການຮ່ວມມືກັບ ສປປ ລາວ ສຳລັບໄລຍະ 2017-2021 ໃນສາມຂົງເຂດວຽກຈຸດສຸມເຊັ່ນ ການເຕີບໂຕແບບມີສ່ວນຮ່ວມ, ການລົງທຶນໃສ່ຊັບພະຍາກອນມະນຸດ, ແລະ ການປົກປັກຮັກສາສີ່ງແວດລ້ອມ ຊື່ງຂົງເຂດວຽກທັງໝົດເຫລົ່ານີ້ຈະໄດ້ຮັບການສະໜັບສະໜູນຈາກໂຄງການກະສິກຳໃໝ່ນີ້.
