ທະນາຄານໂລກ ໃຫ້ການຊ່ວຍເຫຼືອ ໃນວຽກງານ ປະຕິຮູບດ້ານນະໂຍບາຍ ແລະ ອົງກອນ ສຳລັບສປປ ລາວ ທີ່ ມີເສດຖະກິດອຸດົມຮ່ັງມີ ດ້ວຍຊັບພະຍາກອນທໍາມະຊາດ

ທຶນຊ່ວຍເຫຼືອລ້າໃນມູນຄ່າ US$ 20 ລ້ານ ສຳລັບ ແຜນງານສະໜັບສະໜູນການຫລຸດຜ່ອນຄວາມທຸກຍາກໄລຍະ 8
ຖືກຮັບຮອງໂດຍສະພາບໍລິຫານຂອງ ທະນາຄານໂລກ

ວໍຊິງຕັນ ດີຊີ, 9 ສິງຫາ 2012 – ມື້ນີ້, ສະພາບໍລິຫານຂອງທະນາຄານໂລກ ໄດ້ຮັບຮອງທຶນຊ່ວຍເຫຼືອລ້າມູນຄ່າ US$20 ລ້ານ ສໍາລັບແຜນງານສະໜັບສະໜູນການຫລຸດຜ່ອນຄວາມທຸກຍາກ ຫຼື Poverty Reduction Support Operation (PRSO) ໄລຍະ 8 ເຊິ່ງເປັນແຜນງານທຳອິດ ຂອງແຜນງານສະໜັບສະໜູນການຫລຸດຜ່ອນຄວາມທຸກຍາກຊຸດທີສາມນີ້. ທຶນຊ່ວຍເຫຼືອລ້າດັ່ງກ່າວ ຈະສານຕໍ່ຈາກ ຜົນໄດ້ຮັບ ທີ່ຍາດມາໄດ້ຈາກ ການຈັດຕັ້ງປະຕິບັດແຜນງານສະໜັບສະໜູນການຫລຸດຜ່ອນຄວາມທຸກຍາກໃນ ຊຸດຜ່ານມາ ໂດຍໄດ້ຮັບທຶນຊ່ວຍເຫຼືອລ້າທັງໝົດໃນມູນຄ່າ US$68 ລ້ານ ນັບແຕ່ ປີ 2004.

ທຶນຊ່ວຍເຫຼືອລ້າທີ່ຖືກຮັບຮອງໃນຄັ້ງນີ້ ແມ່ນການສານຕໍ່ ການຊ່ວຍເຫຼືອຂອງ ທະນາຄານໂລກ ເຂົ້າໃນແຜນງານສະໜັບສະໜູນ ການຫລຸດຜ່ອນຄວາມທຸກຍາກທີ່ຜ່ານມາ ເຊິ່ງມີເປົ້າໝາຍ ເພື່ອຊ່ວຍເຫຼືອວຽກງານ ປະຕິຮູບດ້ານນະໂຍບາຍ ແລະ ອົງກອນ ເພື່ອຈະຊ່ວຍໃຫ້ມີການຄຸ້ມຄອງລາຍຮັບທີ່ເພີ່ມຂຶ້ນ ຈາກຂະແໜງຊັບພະຍາກອນທໍາມະຊາດນັ້ນ ມີຄວາມຍືນຍົງ ແລະ ເພື່ອນໍາໃຊ້ໃນການສະໜອງການບໍລິການພາກລັດຕ່າງໆໃຫ້ດີຂຶ້ນກ່ວາເກົ່າ, ທັງໝົດນີ້ ແມ່ນສອດຄ່ອງກັບ ບູລິມະສິດຂອງລັດຖະບານ ທີ່ໄດ້ກໍານົດໄວ້ໃນ ແຜນພັດທະນາເສດຖະກິດ-ສັງຄົມແຫ່ງຊາດ.

ທ່ານ ນາງ ເຈເນວີວ ບົວໂຣ - Genevieve Boyreau, ຫົວໜ້າທີມງານ ແຜນງານສະໜັບສະໜູນການຫລຸດຜ່ອນຄວາມທຸກຍາກ ຂອງທະນາຄານໂລກ ປະຈໍາລາວ  ໄດ້ກ່າວວ່າ: “PRSO ຊຸດນີ້ ມີຂຶ້ນໃນເວລາທີ່ສໍາຄັນຍິ່ງ ຊຶ່ງເປັນໄລຍະ ທີ່ເສດຖະກິດຂອງ ສປປ ລາວ ໄດ້ຮັບຜົນປະໂຫຍດ ຈາກຂະແໜງຊັບພະຍາກອນທໍາມະຊາດທີ່ອຸດົມຮັ່ງມີ, ແລະ ຖ້າໄດ້ຮັບການຄຸ້ມຄອງເປັນຢ່າງດີ ກໍ ຈະຊ່ວຍໃຫ້ ສປປ ລາວ ສາມາດ ເຕີບໂຕໃນໄລຍະກາງແບບທົ່ວເຖິງ ແລະ ຍືນຍົງໄດ້. ນະໂຍບາຍດ້ານເສດຖະກິດມະຫາພາກ ແລະ ດ້ານການຄຸ້ມຄອງທີ່ເໝາະສົມ ຈະເຮັດໃຫ້ ຄວາມອຸດົມຮັ່ງມີດ້ານຊັບພະຍາກອນຂອງປະເທດ ສາມາດປະກອບສ່ວນຢ່າງໃຫຍ່ຫຼວງ ເຂົ້າໃນການເຕີບໂຕ ໃນລັກສະນະທີ່ວ່ອງໄວ ແລະ ຍືນຍົງ ແລະ ຍັງປະກອບສ່ວນເຂົ້າໃນວຽກງານຫລຸດຜ່ອນຄວາມທຸກຍາກອີກດ້ວຍ”

ນັບແຕ່ ປີ 2004 ເປັນຕົ້ນມາ, PRSO ປະຈໍາປີ ທັງໝົດເຈັດໄລຍະ ໄດ້ປະກອບສ່ວນເຂົ້າໃນ ນະໂຍບາຍຕ່າງໆຂອງລັດຖະບານເພື່ອສົ່ງເສີມ ການເຕີບໂຕທາງເສດຖະກິດ, ຫລຸດຜ່ອນຄວາມທຸກຍາກ ແລະ ແກ້ໄຂບັນຫາດ້ານການພັດທະນາຊັບພະຍາກອນມະນຸດ ແລະ ກຸ່ມຄົນທີ່ດ້ອຍໂອກາດ ໂດຍການສະໜັບສະໜູນ ວຽກງານທີ່ກວມເອົາຫຼາຍຂະແໜງການ ການປັບປຸງປະຕິຮູບອົງກອນ, ໂດຍສະເພາະ ແມ່ນ ວຽກງານປະຕິຮູບ ຂອງການຄຸ້ມຄອງການເງິນພາກລັດ ທີ່ໄດ້ຊ່ວຍສ້າງໃຫ້ມີນະໂຍບາຍດ້ານການຄຸ້ມຄອງງົບປະມານ ແລະ ໄດ້ປັບປຸງ ຄວາມໂປ່ງໃສ ກໍຄື ຄວາມຮັບຜິດຊອບ ຂອງລະບົບການເງິນພາກລັດ. ພ້ອມກັນນີ້, ການປະຕິຮູບດັ່ງກ່າວ ຍັງໄດ້ຊ່ວຍປັບປຸງສະພາບແວດລ້ອມດ້ານການລົງທຶນ, ການຄ້າ ແລະ ການດໍາເນີນທຸລະກິດ.

ເພື່ອຮັບປະກັນ ຜົນໄດ້ຮັບ ແລະ ໝາກຜົນ ຈາກ ການປະຕິຮູບ ພາຍໄຕ້ການສະໜັບສະໜູນຂອງແຜນງານທີ່ຜ່ານມານັ້ນ, PRSO ຊຸດທີສາມນີ້ ຈະສືບຕໍ່ໃຫ້ການຊ່ວຍເຫຼືອໃນບາງຂົງເຂດນະໂຍບາຍ ພ້ອມທັງ ເອົາໃຈໄສ່ຕໍ່ບາງຂົງເຂດ ຂອງການປະຕິຮູບ ເພື່ອໃຫ້ສາມາດຮັບມືກັບສິ່ງທ້າທາຍຕ່າງໆ ໃນການພັດທະນາຂອງປະເທດ, ຮັບປະກັບໃຫ້ມີການເຕີບໂຕແບບທົ່ວເຖິງ ແລະ ເຮັດໃຫ້ເສດຖະກິດມີຄວາມຫຼາກຫຼາຍ. ເວົ້າສະເພາະ, PRSO8 ຈະແນໄສ່ຫ້າຂົງເຂດນະໂຍບາຍ ທີ່ ສຳຄັນຕໍ່ ຄວາມຍືນຍົງໃນການພັດທະນາເສດຖະກິດ ຂອງ ສປປ ລາວ ຊຶ່ງ ນັບມື້ນັບເອື່ອຍອີງໃສ່ການພັດທະນາຂະແໜງຊັບພະຍາກອນທຳມະຊາດ. ຫ້າຂົງເຂດນະໂຍບາຍດັ່ງກ່າວມີເປົ້າໝາຍຄື:

• ເສີມສ້າງຄວາມເຂັ້ມແຂງດ້ານ ການປະສານງານ ແລະ ການຄຸ້ມຄອງນະໂຍບາຍ ເສດຖະກິດມະຫາພາກ  ທີ່ຕອບສະໜອງຕໍ່ການພັດທະນາຕ່າງໆ ໃນຂະແໜງຊັບພະຍາກອນທໍາມະຊາດ ແລະ ສອດຄ່ອງກັບການເຕີບໂຕ ກໍຄື ສະເຖຍລະພາບທາງເສດຖະກິດ;
  
• ເສີມສ້າງຄວາມເຂັ້ມແຂງດ້ານ ການຄຸ້ມຄອງການເງິນພາກລັດ  ໃນຂະແໜງຊັບພະຍາກອນທໍາມະຊາດ ເພື່ອປັບປຸງຄວາມໜ້າເຊື່ອຖືໃນການຄຸ້ມຄອງງົບປະມານ, ຄວາມເປັນລະບຽບຮຽບຮ້ອຍ ແລະ ການມີສ່ວນຮ່ວມໃນຂະບວນການວາງແຜນງົບປະມານ ກໍຄື ການຈັດສັນງົບປະມານ ໃຫ້ຂະແໜງການ ແລະ ການລາຍງານການຈັດຕັ້ງປະຕິບັດງົບປະມານ;
  
• ຊ່ວຍເຫຼືອແກ່ ວຽກງານ ການຄຸ້ມຄອງລາຍຮັບແບບຍືນຍົງ ໃນຂະແໜງຊັບພະຍາກອນທໍາມະຊາດ ໂດຍສະເພາະໃນຂະແໜງບໍ່ແຮ່ ແລະ ໄຟຟ້ານໍ້າຕົກ. ວຽກງານນີ້ ຈະປະກອບສ່ວນເຂົ້າໃນການສ້າງບັນດາລະບຽບການຕ່າງໆທີ່ມີການປະສານງານກັນເປັນຢ່າງດີ ລະຫວ່າງພາກສ່ວນກ່ຽວຂ້ອງ ແລະ ສາມາດຈັດຕັ້ງ ປະຕິບັດໄດ້ ເຊິ່ງຈະເປັນທິດຊີ້ນໍາ ລະບອບການຄຸ້ມຄອງການເງິນ ແລະ ລາຍຮັບ ສຳລັບການພັດທະນາ ຂະແໜງບໍ່ແຮ່ ແລະ ໄຟຟ້ານໍ້າຕົກແບບຍືນຍົງ;
  
• ປັບປຸງ ການບໍລິການພາກລັດ  ຜ່ານກົນໄກສະໜອງທຶນແບບຍືນຍົງ ສຳລັບໂຮງຮຽນ ແລະ ສິ່ງອໍານວຍຄວາມສະດວກທາງສາທາລະນະສຸກ. ວຽກງານນີ້ ຈະຊ່ວຍ ເພີ່ມອັດຕາການເກີດລູກ ໂດຍພາຍໄຕ້ການເບິ່ງແຍງຂອງພະນັກງານແພດໝໍທີ່ມີຄວາມຊໍານິຊໍານານ ແລະ ການເພີ່ມອັດຕາສ່ວນ ປື້ມຕໍາລາຮຽນຕໍ່ເດັກນັກຮຽນ ໃຫ້ປະກົດຜົນເປັນຈິງ;
  
• ປັບປຸງ ບັນຍາກາດດ້ານການລົງທຶນ ແລະ ການຄ້າ ເພື່ອດຶງດູດເອົາການລົງທຶນທີ່ມີຄຸນະພາບ, ຫລຸດຜ່ອນຕົ້ນທຶນຂອງການຄ້າ ແລະ ອຳນວຍຄວາມສະດວກໃຫ້ແກ່ການເຕີບໂຕ ທີ່ມີການກະຈາຍຄວາມຫຼາກຫຼາຍທາງເສດຖະກິດ.
  
  ແຜນງານສະໜັບສະໜູນການຫລຸດຜ່ອນຄວາມທຸກຍາກ ຖືເປັນສ່ວນສຳຄັນຂອງ ຍຸດທະສາດຮ່ວມພັດທະນາ ສປປ ລາວ ທີ່ທາງສະພາບໍລິຫານ ທະນາຄານໂລກ ໄດ້ຮັບຮອງເອົາເມື່ອເດືອນ ມີນາ 2012 ທີ່ຜ່ານມາ ໂດຍມີເປົ້າໝາຍແນໃສ່ ປັບປຸງການຄຸ້ມຄອງພາກລັດ, ເສີມສ້າງຄວາມອາດສາມາດໃນການແຂ່ງຂັນ ແລະ ການເຊື່ອມໂຍງ, ການຄຸ້ມຄອງຊັບພະຍາກອນທໍາມະຊາດແບບຍືນຍົງ ແລະ ການພັດທະນາແບບທົ່ວເຖິງ ດ້ວຍການ ຊ່ວຍເຫຼືອແກ່ວຽກງານປະຕິຮູບດ້ານນະໂຍບາຍ ແລະ ອົງກອນ.