នៅពេលដែលអង្គការសុខភាពពិភពលោកប្រកាសថា កូវីដ-១៩ ជាជំងឺរាតត្បាតសកល នៅថ្ងៃទី១១ ខែមីនា ឆ្នាំ២០២០ ប្រទេសភាគច្រើនមិនបានត្រៀមលក្ខណៈជាមុនសម្រាប់ការផ្ទុះឡើងនៃមេរោគនេះទេ ដែលមិនយូរប៉ុន្មានបានរីករាលដាលយ៉ាងឆាប់រហ័សនៅទូទាំងពិភពលោក។ កម្ពុជាក៏ស្ថិតនៅក្នុងចំណោមប្រទេសភាគច្រើននោះដែរ។ ទោះបីជាយ៉ាងណាក៏ដោយ ក្រសួងសុខាភិបាលកម្ពុជាបានធ្វើការឆ្លើយតបភ្លាមៗ តាមរយៈផែនការសកម្មភាពជាតិសម្រាប់ទប់ស្កាត់មេរោគកូវីដ-១៩ ដែលដាក់ចេញនូវវិធានការនានាសម្រាប់បង្កើនការរកឃើញ និងគ្រប់គ្រងករណីឆ្លងមេរោគ និងបង្កើនការបម្រុងស្តុកសម្រាប់ការផ្គត់ផ្គង់សម្ភារ និងគ្រឿងបរិក្ខារវេជ្ជសាស្ត្រសំខាន់ៗ។ ផែនការសកម្មភាពនេះក៏បាននាំមកនូវវិធានការទូលំទូលាយជាច្រើន សម្រាប់ពង្រឹងប្រព័ន្ធសុខាភិបាលរបស់កម្ពុជា ដែលសព្វថ្ងៃនេះកំពុងឈរលើមូលដ្ឋានរឹងមាំមួយសម្រាប់កម្ពុជាក្នុងការឆ្លើយតបទៅនឹងភាពអាសន្ននានា នៅពេលអនាគត។
ផែនការសកម្មភាពជាតិ គឺជាអភិក្រមអនុវត្តនៅគ្រប់ផ្នែកទាំងអស់នៃរាជរដ្ឋាភិបាល ក្នុងការឆ្លើយតបទៅនឹងភាពអាសន្នផ្នែកសុខភាពសាធារណៈ និងការខូចខាតដល់សេដ្ឋកិច្ចសង្គមដែលបង្កឡើងដោយជំងឺកូវីដ។ កិច្ចសហការអន្តរជាតិមានសារៈសំខាន់ណាស់ក្នុងការជួយឱ្យផែនការសកម្មភាពជាតិអនុវត្តបានជោគជ័យ និងផ្តល់ការគាំទ្រទាន់ពេលវេលាដល់គោលដៅយុទ្ធសាស្ត្រទាំងបួនរបស់យុទ្ធសាស្រ្តនេះ ក្នុងនោះមាន ការកាត់បន្ថយ និងពន្យារពេលការឆ្លង, ការកាត់បន្ថយជំងឺធ្ងន់ធ្ងរ និងកាត់បន្ថយការស្លាប់ពាក់ព័ន្ធជាមួយកូវីដ, ការធានាឱ្យមានជាប្រចាំនូវសេវាសុខភាពសំខាន់ៗ, និងកាត់បន្ថយផលប៉ះពាល់សង្គម និងសេដ្ឋកិច្ច។
ជំនួយរបស់ធនាគារពិភពលោកដល់ក្រសួងសុខាភិបាល តាមរយៈ គម្រោងឆ្លើយតបបន្ទាន់របស់កម្ពុជាទៅនឹងជំងឺកូវីដ-១៩ ចំនួន ២៤,៦១ លានដុល្លារអាមេរិក បានជួយប្រទេសនេះបំពេញការខ្វះខាតសំខាន់ៗក្នុងការអនុវត្តផែនការសកម្មភាពជាតិ។ នៅក្នុងនោះរួមមាន ការបង្កើនសមត្ថភាពវិនិច្ឆ័យរោគសម្រាប់មន្ទីរពិសោធន៍នៅតាមមន្ទីរពេទ្យបង្អែកខេត្តនិងក្រុងទាំង ១៤ និងការទិញបរិក្ខារ និងសម្ភារៈពេទ្យចាំបាច់នានាដូចជា បំពង់ខ្យល់, ម៉ាស៊ីនតាមដានស្ថានភាពអ្នកជំងឺ និងម៉ាស៊ីនថតកាំរស្មីអ៊ិច ជាដើម។ កញ្ចប់ជំនួយនេះថែមលើជំនួយចំនួន ១៤លានដុល្លារអាមេរិក ដែលពេលនោះកំពុងត្រូវបានបញ្ចេញឱ្យកម្ពុជាតាមរយៈ សមាសភាគសម្រាប់បម្រុងដើម្បឆ្លើយតបពេលមានអាសន្ន (CERC) នៃគម្រោងលើកកម្ពស់គុណភាពនិងសមធម៌សុខាភិបាល។ សមាសភាគ CERC ត្រូវបានយកមកអនុវត្តដើម្បីបង្កើនសមត្ថភាពរបស់មន្ទីរពិសោធន៍ជាតិចំនួនពីរឱ្យបានយ៉ាងឆាប់រហ័ស, សាងសង់ និងបំពាក់មន្ទីរពិសោធន៍ប្រចាំតំបន់ចំនួនពីរ សម្រាប់ការធ្វើតេស្តរកកូវីដ-១៩ និង ទិញរថយន្តសង្គ្រោះបន្ទាន់ និងគ្រឿងបរិក្ខារវេជ្ជសាស្ត្រសម្រាប់ការបញ្ជូន និងព្យាបាលអ្នកជំងឺ នៅតាមមណ្ឌលព្យាបាលជំងឺកូវីដ-១៩។
